8 Помяните сия и возстените, покайтеся, прельстившиися, обратитеся сердцем

9 и помяните первая от века, яко аз есмь Бог, и несть еще разве мене:

10 возвещаяй первее последняя, прежде неже быти им, и абие сбышася: и рекох: весь совет мой станет, и вся, елика совещах, сотворю.

11 Призываяй от восток птицу, и от земли издалеча, о нихже совещах: рекох и приведох, создах и сотворих, приведох и и благопоспеших путь его.

12 Послушайте мене, погубльшии сердце, сущии далече от правды:

13 приближих правду мою, и не удалится, и спасение, еже от мене, не умедлю: дах в сионе спасение израилю во прославление.

1 Сниди, сяди на земли, дево, дщи вавилоня, вниди во тму, дщи халдейска, яко не приложиши ксему прозыватися мягка и юна.

2 Возми жерновы, мели муку, открый покрывало твое, открый седины, возсучи голени, прейди реки:

3 открыется студ твой, явятся укоризны твоя, праведное от тебе возму, ктому не предам человеком.

4 Рече избавивый тя Господь саваоф, имя ему святый израилев:

5 сяди умилена, вниди во тму, дщи халдейска, ксему не прозовешися крепость царства.

6 Разгневахся на люди моя, осквернила еси наследие мое: аз вдах я в руку твою, ты же не дала им милости, старчий ярем отягчила еси зело

7 и рекла еси: в век буду владычица: не помыслила еси сих в сердцы твоем, ниже помянула еси последних:

8 ныне же слыши сие, юная, седящая, уповающая, глаголющая в сердцы своем: аз есмь, и несть иныя, не сяду вдовою и не познаю сиротства.

9 Ныне же приидут на тя два сия внезапу во един день, безчадие и вдовство внезапу приидет на тя, в волшебстве твоем и в крепости волхвов твоих зело,

10 в надеянии злобы твоея: ты бо рекла еси: аз есмь, и несть иныя: увеждь, яко смышление сих и блужение твое будет тебе срам: и рекла еси сердцем своим: аз есмь, и несть иныя.

11 И приидет на тя пагуба, и не увеси, пропасть, и впадеши в ню: и приидет на тя печаль, и не возможеши чиста быти: и приидет на тя внезапу пагуба, и не увеси.

12 Стани ныне с волхвы твоими и со многими чары твоими, имже научилася еси из юности твоея, аще возмогут ти помощи.

13 Утрудилася еси в советех твоих: да станут ныне и спасут тя звездочетцы небесе, смотряющии звезд, да возвестят ти, что имать на тя приити.

14 Се, вси яко хврастие огнем погорят и не изимут души своея из пламене, понеже имаши углие огненное, сяди на них.

15 Сии будут тебе помощь: трудилася еси в преложении от юности, человек сам в себе прельстися, тебе не не будет спасения.

1 Услышите сия, доме иаковль, прозваннии именем израилевым и изшедшии из иуды, кленущиися именем Господа Бога израилева, поминающии не со истиною, ниже со правдою,

2 и придержащиися имени града святаго, и о Бозе израилеве подтверждающиися: Господь саваоф имя ему.

3 Преждняя еще возвестих, и из уст моих изыдоша, и слышано бысть: внезапу сотворих, и найде.

4 Вем, яко жесток еси, и жила железна выя твоя, и чело твое медяно.

5 И возвестих ти, яже древле, прежде неже приити на тя: слышана тебе сотворих, да не когда речеши, яко идоли мне сия сотвориша, и не рцы, яко изваянная и слиянная заповедаша мне.

6 Слышасте вся, и вы не разуместе: но и слышана тебе сотворих новая отныне, яже имут быти:

7 и не рекл еси: ныне бывают, а не прежде, и не в преждния дни слышал еси сия: не рцы: ей, вем сия.

8 Не ведел еси, ниже разумел еси, ниже исперва отверзох ушеса твоя: ведех бо, яко отвергая отринеши и беззаконник еще от чрева прозовешися.

9 Имене моего ради покажу ти ярость мою, и славная моя наведу на тя, да не потреблю тебе.

10 Се, продах тя не сребра ради: изях же тя из пещи убожества.

11 Мене ради сотворю ти, яко мое имя оскверняется, и славы моея иному не дам.

12 Послушай мене, иакове и израилю, егоже аз призываю: аз есмь первый и аз есмь во век.

13 И рука моя основа землю, и десница моя утверди небо: призову я, и станут вкупе,

14 и соберутся вси и услышат: кто им возвести сия? любя тя сотворих волю твою над вавилоном, еже отяти племя халдейско.

15 Аз глаголах, аз призвах, приведох и, и благопоспешит путь его.

16 Приступите ко мне и слышите сия, исперва не отай глаголах: егда бываху, тамо бех, и ныне Господь Господь посла мя и дух его.

17 Тако глаголет Господь, избавивый тя, святый израилев: аз есмь Господь Бог твой, научих тя, еже обрести тебе путь, по немуже пойдеши.

18 И аще бы еси послушал заповедий моих, то был бы убо аки река мир твой, и правда твоя яко волна морская,

19 и было бы яко песок семя твое, и изчадия чрева твоего яко персть земли: ниже ныне потребишися, ниже погибнет имя твое предо мною.

20 Изыди от вавилона, бежай от халдеев: глас радости возвестите, и да слышано будет сие, возвестите даже до последних земли, глаголите: избави Господь раба своего иакова.

21 И аще вжаждут, пустынею проведет их и воду из камене изведет им: разсядется камень, и потечет вода, и испиют людие мои.

22 Несть радоватися нечестивым, глаголет Господь.

1 Послушайте мене, острови, и внемлите, языцы. Временем многим стояти будет, глаголет Господь: от чрева матере моея нарече имя мое,

2 и положи уста моя яко мечь остр, и под кровом руки своея скры мя: положи мя яко стрелу избранну, и в туле своем скры мя,

3 и рече ми: раб мой еси ты, израилю, и в тебе прославлюся.

4 Аз же рекох: вотще трудихся, всуе и ни во что дах крепость мою: сего ради суд мой пред Господем и труд мой пред Богом моим.

5 И ныне тако глаголет Господь, создавый мя от чрева раба себе, еже собрати иакова к нему и израиля: соберуся и прославлюся пред Господем, и Бог мой будет мне крепость.

6 И рече ми: велие ти есть, еже назватися тебе рабом моим, еже возставити племена иаковля и разсеяние израилево обратити: се, дах тя в завет рода, во свет языком, еже быти тебе во спасение даже до последних земли.

7 Тако глаголет Господь, избавивый тя Бог израилев: освятите уничижающаго душу свою, гнушаемаго от язык рабов княжеских: царие узрят его, и востанут князи и поклонятся ему Господа ради, яко верен есть святый израилев, и избрах тя.

8 Тако глаголет Господь: во время приятно послушах тебе и в день спасения помогох ти, и сотворих тя и дах тя в завет вечный языков, еже устроити землю и наследити наследия пустыни,

9 глаголюща сущым во узах: изыдите, и сущым во тме: открыйтеся. На всех путех пастися будут, и на всех стезях пажить их:

10 не взалчут, ниже вжаждут, ниже поразит их зной, ниже солнце, но милуяй их утешит их и сквозе источники водныя проведет их.

11 И положу всяку гору в путь и всяку стезю в паству им.

12 Се, сии издалеча приидут, сии от севера и от моря, инии же от земли персския.

13 Радуйтеся, небеса, и веселися, земле, да отрыгнут горы веселие и холми правду, яко помилова Бог люди своя и смиренныя людий своих утеши.

14 Рече же сион: остави мя Господь, и Бог забы мя.

15 Еда забудет жена отроча свое, еже не помиловати изчадия чрева своего? аще же и забудет сих жена, но аз не забуду тебе, глаголет Господь.

16 Се, на руках моих написах стены твоя, и предо мною еси присно,

17 и вскоре возградишися, от нихже разорился еси, и опустошившии тя изыдут из тебе.

18 Возведи окрест очи твои и виждь вся, се, собрашася приидоша к тебе, живу аз, глаголет Господь: яко всеми ими аки в красоту облечешися и обложиши себе ими яко утварию невеста.

19 Понеже пустая твоя и разсыпаная и падшая ныне утеснеют от обитающих, и удалятся от тебе поглощающии тя.

20 Рекут бо во ушы твои сынове твои, ихже был погубил еси: тесно ми место, сотвори ми место, да вселюся.

21 И речеши в сердцы своем: кто мне породи сих? аз же безчадна и вдова, сих же кто воспита мне? аз же остахся едина, сии же мне где быша?

22 Тако глаголет Господь Господь: се, воздвизаю на языки руку мою и на островы воздвигну знамение мое, и приведут сыны твоя в лоне и дщери твоя на плещах возмут.