31 И овна совершения да возмеши и испечеши мяса на месте святе,

32 и да ядят аарон и сынове его мяса овня, и хлебы, яже в коши у дверий скинии свидения:

33 да ядят сия, имиже освятишася в них, совершити руки своя, освятити я: и иноплеменник да не снест от них, суть бо свята.

34 Аще же останется от мяс жертвы совершения и от хлебов до утрия, да сожжеши останки огнем: да не снедятся, освящение бо есть.

35 И сотвориши аарону и сыном его тако по всем, елика заповедах тебе: седмь дний совершиши руце их.

36 И телца греха ради да сотвориши в день очищения: и да очистиши олтарь, егда освящаеши на нем: и помажеши его, яко освятити его.

37 Седмь дний очистиши олтарь и освятиши его, и будет олтарь святая святых: всяк прикасаяйся олтарю освятится.

38 И сия суть, яже сотвориши на олтари: агнца единолетна непорочна два на всяк день на олтари присно жертву непрестанную:

39 агнца единаго да сотвориши рано, и втораго агнца да сотвориши в вечер:

40 и десятую часть муки пшеничны с елеем смешены, в четвертую часть ина, и возлияние четвертую часть меры ина вина единому овну.

41 И агнца втораго да сотвориши в вечер, якоже утреннюю жертву, и возлияние его: сотвориши в воню благоухания приношение Господу.

42 Жертву всегдашнюю в слухи и в роды вашя пред дверми скинии свидения пред Господем, в нихже познан буду тебе тамо, якоже глаголати к тебе.

43 И завещаю тамо сыном израилевым, и освящуся во славе моей,

44 и освящу скинию свидения и олтарь, и аарона и сыны его освящу, священнодействовати мне,

45 и нарекуся в сынех израилевых, и буду им Бог:

46 и уведят, яко аз есмь Господь Бог их, изведый их из земли египетския, нарещися им и быти им Бог.

1 И да сотвориши олтарь кадилный от древ негниющих:

2 и сотвориши и лактя в долготу и лактя в широту, четвероуголен да будет, и двою лактий в высоту: от него да будут роги его.

3 И позлатиши златом чистым огнище его, и стены его около, и роги его: и да сотвориши ему витый венец злат около.

4 И два колца злата чиста да сотвориши под витым венцем его на обою углу, да сотвориши на обоих странах: и будут колца носилам, якоже подимати оный ими.

5 И да сотвориши носила от древес негниющих, и позлатиши я златом:

6 и да положиши его прямо завесы, сущия у кивота свидения, в нихже познан буду тебе оттуду.

7 И да кадит над ним аарон фимиамом сложеным благовонным рано рано: егда устрояет светила, да кадит над ним:

8 и егда вжигает аарон светила с вечера, да кадит над ним: фимиам всегдашний присно пред Господем в роды их:

9 и да не принесеши над него фимиама инаго: приношения, жертвы и возлияния да не пролиеши на него.

10 И да очистит над ним аарон у рогов его единою в лето: от крове очищения грехов умилостивления единою в лето да очистит его в роды их: святое святых есть Господу.

11 И рече Господь к моисею, глаголя:

12 аще возмеши исчисление сынов израилевых в пресмотрении их, и дадят кийждо искупление за душу свою Господу, и не будет в них падения в пресмотрении их.

13 И сие есть, еже дадят, елицы аще приступят в пресмотрение, полдидрахмы, еже есть по дидрахме святей: двадесять цат дидрахма: пол же дидрахмы, дань Господу.

14 Всяк входяй в пресмотрение от двадесяти лет и вышше, да дадут дань Господу:

15 богатый да не приложит, и нищий да не умалит от полудидрахмы, егда дают дань Господу (от сынов израилевых), еже умоляти о душах ваших.

16 И да возмеши сребро дани от сынов израилевых, и даси е на соделание скинии свидения: и да будет сыном израилевым память пред Господем, еже умоляти о душах ваших.

17 И рече Господь моисею, глаголя:

18 сотвори умывалницу медяну и стояло ей медяно, еже умыватися, и да поставиши ю между скиниею свидения и между олтарем, и да влиеши в ню воду:

19 и да умывает аарон и сынове его из нея руки своя и ноги водою:

20 егда входят в скинию свидения, да омыются водою, и не умрут: или егда приходят ко олтарю служити и приносити всесожжения Господу,

21 умыют руце и нозе водою, егда входят в скинию свидения, да не умрут, и да будет им законно вечно, ему и родом его по нем.

22 И рече Господь к моисею, глаголя:

23 и ты возми ароматы, цвет смирны избранныя пять сот сиклев, и киннамома благовонна пол сего, двести пятьдесят, и трости благовонныя двести пятьдесят,

24 и касии пять сот сиклев святаго, и елеа от маслин (меру) ин,

25 и сотвориши сей елей помазание святое, миро помазателное художеством мироварца: елей помазание святое будет,

26 и да помажеши от него скинию свидения, и кивот скинии свидения,

27 и вся сосуды ея, и светилник и вся сосуды его, и олтарь кадилный,

28 и олтарь всесожжения и вся его сосуды, и трапезу и вся ея сосуды, и умывалницу и стояло ея,

29 и освятиши я, и будут святая святых: всяк прикасаяйся им освятится:

30 и аарона и сыны его помажеши, и освятиши я священнодействовати мне:

31 и сыном израилевым да речеши, глаголя: елей масть помазания свят да будет сей вам в роды вашя:

32 плоть человеча да не помажется (им), и по сложению сему да не сотворите сами себе иного сице: свят есть и освящение будет вам:

33 иже аще сотворит сице, и иже аще даст от него иноплеменнику, потребится от людий своих.

34 И рече Господь к моисею: возми себе ароматы, стакти, ониха и халвана благовонна и ливана чистаго: все то в равну меру да будет:

35 и да сотворят в нем фимиам мироварный, дело мироварца смешеное, чисто, дело сто:

36 и раздробиши от сих по тонку, и положиши прямо свидению в скинии свидения, отюнудуже познан буду тебе тамо: святое святых будет вам фимиам:

37 по сложению сему да не сотворите себе сами, освящение будет вам от Господа:

38 иже аще сотворит сице, еже обоняти от него, погибнет душа того от людий своих.

1 И рече Господь к моисею, глаголя:

2 се, нарекох именем веселеила сына урии, сына орова, от племене иудина,

3 и наполних его Духом Божиим премудрости и смышления и ведения, во всяком деле разумети

4 и архитектонствовати, делати злато и сребро и медь, и синету и багряницу, и червленицу прядену и виссон сканый,

5 и каменное дело, и различная древоделства делати во всех делех:

6 и аз дах его и елиава сына ахисамахова от племене данова, и всякому смысленному сердцем дах смысл, и потрудятся, и сотворят вся, елика заповедах тебе:

7 скинию свидения и кивот завета, и очистилище еже верху его, и утварь скинии,

8 и жертвенники, и трапезу и вся сосуды ея, и светилник чистый и вся сосуды его,

9 и умывалницу и стояло ея,

10 и ризы служебныя аароновы и ризы сынов его, еже священнодействовати мне,

11 и елей помазания, и фимиам сложения святаго: по всем, елика заповедах тебе, сотворят.

12 И рече Господь к моисею, глаголя:

13 и ты заповеждь сыном израилевым, глаголя: смотрите и субботы моя сохраните: есть бо знамение между мною и вами в роды вашя, да увесте, яко аз Господь освящаяй вас:

14 и сохраните субботу, яко свята сия есть Господу и вам: осквернивый ю смертию умрет: всяк, иже сотворит в ню дело, потребится душа та от среды людий своих:

15 шесть дний да сотвориши дела, в день же седмый суббота, покой свят Господу: всяк, иже сотворит дело в седмый день, смертию умрет:

16 и да сохранят сынове израилевы субботы держати я в роды их:

17 завет вечен во мне и в сынех израилевых, знамение есть во мне вечное: яко в шести днех сотвори Господь небо и землю, в седмый же день преста, и почи.

18 И даде (Бог) моисею, егда преста глаголя ему на горе синайстей, две скрижали свидения, скрижали каменны написаны перстом Божиим.

1 И видевше людие, яко умедли моисей снити с горы, восташа людие на аарона и глаголаша ему: востани и сотвори нам боги, иже пойдут пред нами: моисей бо сей человек, иже изведе нас от земли египетския, не вемы, что бысть ему.